民主黨副主席劉慧卿做人做事好有自己一套，不過佢尋日喺網上電視訪問運輸及房屋局副局長邱誠武，就差啲畀邱副激死。卿姐喺錄影前已經好細心咁同邱副交代晒點樣望鏡頭，仲教埋佢點坐先型仔，之後又提醒佢唔好一輪嘴咁講嘢，否則會悶死觀眾，可見卿姐有心放水畀邱副建立良好形象，不過邱副似乎唔多生性。
話說錄完一節節目後，卿姐發現邱副講嘢太陰聲細氣，聽眾可能聽唔到佢講乜，即刻要求佢講嘢大聲啲。點知邱副反而寸爆話，自己講嘢無卿姐咁高分貝，又話自己對住女性講嘢係會溫柔啲，堅持唔肯講大聲啲。卿姐睇到佢咁嘅態度，當堂有啲激心，仲叫邱副唔好當佢係女性，當係外星人「阿凡達」就算喎！
邱副唔受教，卿姐亦都唔客氣，個個問題好到肉，例如叫佢講番當局到底喺邊度就高鐵走線諮詢大角咀居民，又問佢內地起高鐵到底用咗幾多錢。不過邱副唔識答之餘，仲要耍官腔，話用香港造價同內地造價比較唔公平；邱副咁唔受教，真係神仙都幫唔到佢！