煲呔曾「內有家鬼」，○九年十一月被一名家務員率領一班「八十後」玩轉禮賓府仍然懵然不知，直到日前有人將有關照片放上網先至揭發事件。雖然仲未知呢名家務員會否受到懲處，但事件暴露禮賓府保安好有漏洞，唔知係咪因為咁觸動咗煲呔曾嘅神經，尋日有電台節目爆料，話事件曝光後，特首辦落「柯打」叫咗警方到禮賓府進行地氈式搜索，檢查有冇畀人裝設偷聽器。
主持人還幽煲呔曾一默，話煲呔曾可能經常同啲心愛錦鯉講心事，如果魚池畀人裝偷聽器就弊嘞，所以好應該搜索吓。特首辦發言人就回應話，禮賓府一直由警員駐守，基於保安理由，有關保安工作及細節不便透露喎，但就無否認有大隊警員操入禮賓府搜索，而警方就話，家務員涉嫌帶朋友入禮賓府事件，一直由特首辦跟進，警方不作評論，都係既不否認又不承認。
不過如果傳聞屬實，就更加凸顯鄉議局主席劉皇發大年初二喺車公廟求得嗰支下籤更加靈驗，事關「八十後」玩完一輪，現在又輪到警員去反轉多一次，應晒「家宅不吉」囉！