本文重點
女人嘅死穴五花八門，不過有一個死穴，就正中大部分女人要害，呢樣就係「撞衫」，無論邊個着得好睇啲都一樣咁尷尬。向來出席正規場合同酒會都愛以旗袍示人嘅香港台灣工商協會會長江素惠（Susie），早前去「香港台灣同胞迎春酒會」就改以St. John金色套裝，再襯埋個金色Gucci手袋示人，貫徹高貴打扮。Susie話呢兩日天氣凍，着旗袍唔夠暖，着套裝就「穩陣」好多。
趁早着或等幾年
Susie識打扮，加上着旗袍較冷門，所以咁多年都無失手，未試過同人撞衫，不過St. John係不少事業女性同名太嘅至愛，好似前高官葉劉淑儀、美容界鼻祖鄭明明、小恩子黎瑞恩嘅媽咪都係fans，所以撞衫機會都幾高。不過Susie就有計化解，佢話一係就着早啲，即係一出就着，咁自然早「着」先機，撞衫無機啦！
如果早唔到，Susie就教大家改變策略，一於着遲啲，過幾年先着。咁又係喎，當佢vintage（復古）咁着，分分鐘仲帶領潮流喎！Susie話佢淨係試過一次着件St. John出嚟遇到葉太，跟住葉太同佢講︰「咦！我都有呢件喎。」換言之，Susie咁多年來都未試過「出事」，女士們不妨學吓Susie呢兩招秘技。
卓妮