之不過咁，良辰吉日想搵個公眾燒烤爐唔係咁容易，聽講有人要一早起身霸住個爐，呢個咁神聖嘅任務通常會交畀任勞任怨廿四孝師奶。既然係咁，功夫茶有一個非常之有建設性嘅提議：全面開放禮賓府，排隊預約燒雞翼！

大家可能會話，堂堂禮賓府係香港第一豪宅，有乜可能全面開放任得九唔搭八阿貓阿狗ＢＢＱ呀？嗱嗱嗱，呢種講法要戒嘞，事關禮賓府其實已經處於半開放式，距離全面開放只不過一步之遙，功夫茶嘅提議絕非強人所難。

唔信係半開放？咁大家不妨上網睇一睇，有一大班相信係八十後嘅年輕人，長驅直入禮賓府，當正係普通屋邨公園咁玩到反轉再反轉，當然唔少得擺出港男港女嘅例牌甫士拍照留念。

禮賓府冇掩雞籠自由行嘅玩法新奇又刺激，可以ＢＢＱ啦，可以玩錦鯉啦，可以扮授勳啦，可以扯區旗啦，甚至可以手指指亂咁篤紀念香港回歸嘅油畫《盛世明珠》。假如你係喪心病狂嘅恐怖分子，相信你其中一個遊戲節目會係搵個隱蔽角落放炸彈。

事件曝光之後，特首辦發言人話喎，相中人係禮賓府一名家務員嘅朋友，佢哋會了解跟進。

正常嚟講，大家一定會十分愕然，嘩，乜禮賓府保安兒戲得咁交關㗎！萬一家務員其中一個朋友係拉登，咁點算？萬一唔知邊個玩到走火入魔，失驚無神捉幾條錦鯉去ＢＢＱ，就算曾蔭權自己唔介意，愛護動物人士都眼火爆啦！

正常當然係咁講啦，不過今時今日乜都唔正常，孕婦打支針都話會胎死腹中嘅，你話係幾咁邪門。所以呢，最好從另一個角度諗一諗，非常時期就要出動非常手段，反正家陣民間怨氣咁濃烈，全面開放禮賓府咪當做與民同樂消消氣囉！

係呀，民怨確係好勁㗎，反高鐵反到七國咁亂，遲啲又話反政改，人人批評特區政府管治失敗，連阿爺都忍唔住要開聲訓令煲呔曾化解深層次矛盾。喺咁嘅情況之下，任君反轉禮賓府不失為負荊請罪討好市民嘅良謀妙計。

怕唔怕百厭星君大肆破壞禮賓府呀？呢座香港第一豪宅始終係受保護嘅歷史文物喎，畀刁民玩到左崩右裂咪好大劑？講到呢一層，先至係良謀妙計嘅精髓所在，記唔記得反高鐵出現反高潮？示威者暴力衝擊立法會，即刻畀曾蔭權食住上，高調批評後生仔嘅做法違反香港核心價值。一旦有人破壞禮賓府，煲呔曾咪又可以轉移視線囉，更加可以扮成受害者，博同情吖嘛，民望應該有機會反彈。

講多無謂，一於去做，即刻全面開放禮賓府，功夫茶第一個報名燒雞翼！