政改諮詢進行得如火如荼，負責擔大旗嘅政制及內地事務局局長林瑞麟（林D9）亦經常企出嚟解畫，不過林D9尋日就一反常態，出席完一個政改論壇後，唔答記者有關補選撥款嘅問題，最後仲衝咗去後樓梯逃離現場。令人最唔明白嘅係，林D9專長係就算大家問佢乜嘢都只會講佢自己嘅標準答案，尋日竟然連人肉錄音機都唔做！
除咗忽然避記者，林D9尋日仲忽然幽默。佢出席論壇時，繼續大數增加立法會議席嘅好處，不過就突然加咗個新論點，就係話將來嘅電台節目主持人搵嘉賓時可以多十個選擇，成個會場嘅市民隔咗兩秒先識得笑兩聲。另外，有嘉賓講笑話如果二○一七年林D9做特首，可能可以快啲處理普選立法會嘅問題，大家都諗住聽完就算，點知林D9好認真咁回應，話做人要知進退，講做特首由尖沙咀排隊到中環都未輪到佢喎！