眨吓眼農曆新年就到，想外遊就要趁早訂定機票，觀塘區議會主席陳振彬（Bunny）恨遊南美好耐，今年終於如願以償，大年初一將會喺巴西里約熱內盧，出席萬人空巷嘅嘉年華。
Bunny尋日現身沙田馬場捧愛駒場，講起遊南美就好雀躍，話此行恨咗好耐，今年終於有十八日長假，於是一口氣暢遊智利、巴西及阿根廷三地。南美治安麻麻，Bunny一早收到風，請專人計劃行程及安排專車接送，所到之處人流唔複雜，包括去智利歎紅酒，再去阿根廷騎馬、鋸牛扒及睇探戈，壓軸好戲係二月十四日嘅巴西嘉年華會，當日係農曆大年初一，Bunny跳住森巴舞過年，節目不知幾豐富。
查實Bunny對南美並非完全陌生，皆因佢曾三度造訪中美洲洽談投資計劃，點知參觀廠房時睇見門口保安荷槍實彈戒備，擔心治安唔好得去邊，最後寧願賺少啲，好過要食驚風散。