今年佢繼續花錢搞形象宣傳。尋日佢喺網誌度話，新一輯嘅宣傳片畀外界批評佢係扮攝青鬼同竊聽，佢話一啲都唔介意，仲自吹自擂話引起多啲人討論已達到佢目標嘅一半。

最弊嘅係鬍鬚曾對自以為創先河出嗰本漫畫推崇備至，話漫畫嘅主角「日仔」讀大學，而故事內容仲講到「日仔」穿梭時空返到去三國時代，好多人認為「日仔」已經大個仔，不妨幫佢安排感情線，所以鬍鬚曾歡迎市民提出有關「日仔」日後際遇安排嘅意見添。

鬍鬚曾嘅現象反映一個問題，就係佢只聽啱聽嘅意見，唔啱聽就當聽唔到，或者係嬉皮笑臉咁蒙混過關，咁嘅政府，根本就掌握唔到市民嘅脈搏，你話幾弊！