本文重點
為咗應付大學四年制，間間大學都大興土木起多幾幢教學大樓應付需要，香港大學都唔例外，港大嘅百周年校園依家仲未完工，校長徐立之早排就大吐苦水，話個工程仲差唔少錢，為免百周年校園爛尾，依家都要周圍撲水。咁啱就嚟到情人節，港大就諗到條絕世好橋嚟籌款。
刻字刻名留念
事緣港大舊年已經叫人捐錢買起百周年校園嘅一磚一瓦，但係反應就好一般，家陣趁住就嚟過年兼情人節，就再向校方同公眾埋手宣傳，只要大家捐出一萬八千至三萬八千蚊，就可以「買起」校園其中一舊磚，兼且可以喺舊磚上面刻字刻名留念，自己設計綿綿情話同愛人表白愛意，呢份禮物獨一無二，收到嘅人必定冧爆咁話。
查實一舊磚先籌到幾萬蚊，幾時先起到成幢樓呀？校方就話，成個計劃目標係籌兩億元，百周年校園到二○一一年底先落成，仲有好多時間，總之就係多多益善，少少無拘。