facebook近日流傳一批年輕人遊玩禮賓府嘅照片，按相片所見，呢班不速之客拖女帶狗，似朋友聚會，而禮賓府一日遊嘅行程節目則相當豐富，先嚟ＢＢＱ大會，燒羊架、煎蝦碌，玩到日落黃昏，就喺煲呔曾御用錦鯉池前放狗同影相，盡情體驗煲呔曾平日賞鯉嘅樂趣同閒情。

呢班八十後玩得盡興，索性登堂入室，直搗府邸心臟會客廳，試坐煲呔曾平日用嚟接待外國政要嘅梳化椅，模擬國家領導人會談，再闖入禮堂，企上禮台上扮授勳，禮賓府嘅廚房同廁所都全部唔放過。佢哋仲手多多，摸勻回歸鼎同紀念香港回歸嘅油畫《盛世明珠》，又拉扯特區區旗扮敬禮，更加直入煲呔曾每日同官員開早禱會嘅會議室，參觀司局長開會前交放手提電話嘅儲物櫃。唔係呢班八十後攻入禮賓府，仲慷慨咁將照片放上facebook，同網民分享，不過如果唔係咁，外界都唔知禮賓府原來可以咁好玩！

玩轉廚房	試用Locker	扮領導人

家務員朋友所為

特首辦發言人回應事件，指相中人係一名禮賓府家務員嘅朋友，煲呔曾唔知情，會了解及跟進事件，目前該名家務員仍在上班。又話禮賓府係莊嚴嘅地方，訪客應予尊重。

煲呔曾鍾意查，就等佢查，不過，禮賓府唔係用嚟招呼賓客嘅咩？今次「以禮好客、以禮待賓」，啱晒嘞，佢信誓旦旦話想同班八十後溝通，依家八十後鍾意喺禮賓府ＢＢＱ，咪畀佢哋開爐起火燒雞翼囉，咪鬼一年開放兩次咁孤寒啦。

煲呔曾成日落區做騷，都係想打造親民形象，倒不如全面開放禮賓府畀市民入內暢遊玩樂啦，其實煲呔曾抵得諗嘅話就應該親自下廚，整番味薑葱煀鯉畀市民一飽口福，咁就仲正，插水民望隨時抽底回升呀。禮賓府變咗遊樂場，以後班八十後上到嚟玩都玩唔切啦，仲有邊鬼個會衝擊禮賓府呀？最可惜係九龍皇帝曾灶財過咗身，唔係畀佢喺禮賓府題番兩隻字，咁禮賓府就真正係香港人嘅禮賓府嘞。