本文重點
牙擦擦嘅冠軍練馬師簡炳墀，身上行頭一向唔嘢小，手戴價值六萬銀嘅Patek Philippe係佢標記，不過食力簡近日換咗畫，轉戴美國名牌Philip Stein TESLAR，錶價平一截，但簡Sir愛不釋手，因為隻錶係公子簡永輝所送，意義重大。
考慮補選出戰新界東
食力簡尋日入馬場，講起公子送嘅鋼錶就甜絲絲，佢話隻錶有專利科技，聲稱戴上後有助提升身體免疫力以抵擋電子污染，具有鎮靜情緒作用，不過簡Sir笑言戴錶非為壓驚，皆因佢行走江湖多年，乜風浪都見過喎。
Philip Stein TESLAR手錶由香港鐘錶界美女胡敏珊代理，呢個品牌喺歐美及港台掀起熱潮，紅星麥當娜都戴佢，食力簡手上嗰隻就盛惠逾萬銀。講完錶後，簡Sir又食住熱辣辣嘅五區總辭補選問題發表意見，佢話若然建制派發起杯葛唔參加補選，佢會考慮出戰新界東喎，係咪成事，大家等睇戲嘞。
卓妮