本文重點
資深設計師鄧達智（William）近排愈忙愈開心，喺啱啱落幕嘅香港國際時裝展，William發表咗一系列以「禪」為主題嘅春夏時裝，令喧鬧嘅時裝世界回歸單純，亦將佢嘅設計帶入咗另一境界。William最滿意名模馬詩慧（Janet）示範嗰套作品，形容係佢咁多年來，尋求將宗教融入設計做得最好嘅一次。
William已經係大師級人物，佢設計嘅最終目的，係以宗教、哲學為主題，於是幾年前就開始嘗試，但由於思維深度未夠，所以呢類體現宗教嘅衫唔多，不過今次比例同數量終於多咗，令佢覺得好開心。
上星期五佢約咗相識廿年老友Patrick，一齊去元朗交通廣場地舖嘅New York Cafe歎晚飯。原來William係踩單車好手，平時會同老友相約食早餐，然後踩幾個鐘單車，難怪佢咁健碩。呢間菜式不拘一格嘅西餐廳係William喺元朗熱門蒲點，法式洋葱湯同埋澳洲鮮青口係佢推介嘅必食菜式。
William話畀卓妮聽，洋葱湯係歎法國菜嘅入門，佢食遍世界各地洋葱湯，高級食肆或者路邊攤檔都有，但覺得呢度最惹味香甜。William好鍾意食嘢，已儼然成為新一代食神，早前參加本地一項食神比賽，佢就偷師New York Cafe嘅洋葱湯，結果獲得金獎添！
推介New York Cafe洋葱湯
間餐廳來頭唔小。老闆Randy同一班伙記都嚟自萬豪酒店，食物絕對係五星級質素，好多名人、區內居住嘅西人，都鍾意喺度打躉，但係佢哋勝在比五星級酒店多咗份心思同人情味。採訪當日，William一見到Randy就問候佢囡囡出世未，原來Randy第一次做老竇，囡囡啱啱過咗預產期一日。當日Randy都搵William試菜，大家嘅情誼又點只食客同老細咁簡單？
卓妮