去年底哥本哈根氣候變化會議，內地率先承諾於二○二○年將碳強度依○五年水平降低百分之四十五，相反本港繼續用能源強度做減碳指標，被批落後。尋日邱騰華出席立法會一個委員會會議，再被追問相關議題時，佢「膽粗粗」推莊畀中央，直指連中央都覺個新指標「艱苦卓絕」，所以香港要再審視吓情況，睇吓點盡量配合，拒訂時間表。

佢講自己嘅難處，話以兩電現時嘅發電組合，好難達到中央減排目標，言下之意係要郁兩電，又談何容易？終於有議員睇唔過眼，劉健儀就出聲鬧：「話做咗咁多嘢，有效定冇效？幾時先做到啲有效嘅嘢？」簡直一矢中的！