泛民昨日開記者會宣布總辭部署，建制派就仍然盤算緊派邊個喺邊度選。尋日有報道話自由黨田北俊、田北辰兩兄弟一個出選港島、另一人出選新界西，呢個當然唔係事實，不過就搞到個局勢亂上加亂。
正當建制派討論緊係咪應該杯葛今次嘅選舉，自由黨方面就認為，田氏兄弟出選的確可以達到唔將今次選舉炒熱嘅效果。
佢哋論據係，如果喺新界東同新界西，由田氏兄弟出選而唔係民建聯，咁民主黨嘅各當區區議員就會翹埋手唔助選，因為要民主黨為長毛梁國雄站台，佢哋都唔多願意，但係如果民建聯派人出選，民主黨就想唔幫長毛都唔得，原因係民主黨嘅區議員都唔想因為今次「練兵」，將自己嘅選區送咗畀民建聯。
姑勿論出手協調人士是否同意呢個邏輯，但自由黨嘅策略好明顯就係：我哋喺地區反正不能因為今次補選建立勢力，大家成全我哋，就算日後都唔會有乜殺傷力，係一個相當卑微嘅定位。