消防處呢期推銷白車調派三級制，不少議員意見多多，點知安排呢個星期一去尖東消防總部參觀了解分級制點運作，保安事務委員會約廿個議員，得兩丁友報名，正式落場更有「一半人」甩底，得番委員會副主席涂謹申一個，同十幾名保安局、消防處官員「困獸鬥」，報咗名嘅長毛梁國雄就甩底冇影。
十數官員招呼議員大駕，點知得阿涂一個，好彩佢出名每事問，一個人都撐到粒幾鐘。阿涂指官員席間不斷盛讚分級有幾好，不過佢仍然問得刁鑽，提出三大漏洞，仲反建議與其投放三千萬資源，不如唔做分級，反而由接線員更詳細同來電嘅市民對話仲划算。
保安事務委員會主席劉江華起初都想去參觀，佢上周四透過助理同秘書處講，如果當日佢冇會開就去啦，點知翌日得知同調查甘威怒炒女助理嘅調查委員會撞時間，於是最終冇報名。劉江華話雖然報名人數少啲，但議員唔去，都唔代表懶。