朱古力有神奇魔力，食咗會產生令人心情愉快嘅多巴胺，簡直可以令人上癮。鐘錶大王孫秉樞都係朱古力狂熱者，每晚睇電視必定歎番兩粒，近日佢愛上黎巴嫩朱古力Patchi，喜歡佢味道唔太甜，食多幾粒都唔怕肥。
Patchi四年前起喺香港都有得賣，孫秉樞兩年前從朋友口中發現佢就一見鍾情，尤其喜歡苦中帶甜嘅黑朱古力及果仁朱古力。佢話，食朱古力最好嘅良伴係電視劇集，一邊享受朱古力喺舌頭融化，一邊追劇，一樂也。近年因為擔心食得多會增磅影響健康，每晚只會淺嚼輕嘗，一粒起兩粒止。
Patchi魔力原來風靡黎巴嫩皇室，成為皇室御用朱古力，不過其原料來自荷蘭，賣點係無添加劑、無人造色素及防腐劑，更順應潮流推出低糖及無糖朱古力，雖然糖分大減，但仍無損朱古力獨有嘅香滑口感。