即係咁，醫院管理局有一份公立醫院藥物名冊，列明乜嘢藥物或者儀器可以畀人用，乜嘢又一定要病人自己出錢買。由於有呢個咁不近人情嘅制度，公立醫院不斷傳出「有錢有得醫、冇錢冇得救」嘅慘情悲歌。喂，有錢都幫襯私家醫院啦，就係因為冇錢先至去公立醫院求救啫，你整份咁嘅藥物名冊，畀唔起錢唔通向閻羅王報名等死呀？

冇錯，真係有人幾乎迫於無奈要等死。就好似四十六歲嘅可憐慈母張惠兒，不幸患上嚴重心衰竭，醫生同佢講，心臟功能只係剩低兩成，救命嘅辦法係植入心臟除顫器，保持心跳正常。問題係，心臟除顫器屬於病人自費項目，而且貴到冇朋友，大拿拿十四萬！

費用昂貴已經攞命，你估醫管局冷血成點呢？佢哋話喎，唔該一次過畀晒！

功夫茶如果係張女士，一聽到醫生咁講，睇怕會即時反枱。醫生，病人有心臟問題先至搵你救命啫，你話要有十四萬先至有得救，分期付款都唔得，係咪想嚇到病人當堂心臟病發暴斃呀！

當然啦，張女士好有修養，冇同醫生反枱，淨係愁眉深鎖，不知如何是好。呢位苦主仲話：「我個仔先得十歲，我唔想咁快離開佢！」唉，萬一大吉利是講句，小朋友十歲就失去母愛，嗰種痛苦真係慘絕人寰。所以話啫，醫者父母心呢句說話未必啱㗎，對於冇乜人性嘅醫管局，正確嘅講法其實係醫者負我心。

好彩，東方日報慈善基金同太陽報愛心基金知道呢件事之後，馬上伸出援手，決定全力協助張惠兒籌措有關費用，務求兩母子平安渡過難關，點都唔可以畀無情無義嘅醫療制度再一次拆散骨肉親情！

再一次？係呀，再一次呀。冇耐前之嘛，有一位患有心臟病嘅伯伯排期做搭橋手術，等咗兩個禮拜都冇人理佢，結果，死咗。再早少少，有一位中年男士心臟病發，你估輪候手術時間要幾耐呢？公立醫院話喎，等下啦，十個月左右輪得到㗎喇。話明心臟病發梗係十萬火急㗎啦，病人等唔切，結果，死咗。

講到呢度，功夫茶奉勸大家一句，你一係做大官，你一係唔好病。只要你有幸官拜財政司司長，就好似曾俊華咁，心臟病發係完全唔使等㗎，公立醫院會自動自覺提供最快最好嘅一流服務，第一時間通波仔，藥到病除，鹹魚翻生。

呢嗱，如果神仙容許世人許三個願望，以下三個應該係最好嘅——

第一個願望：讀者慷慨解囊，大力捐助等錢做手術嘅張惠兒！

第二個願望：手術非常成功，慈母同乖仔可以共享天倫之樂！

第三個願望：醫者良心發現，以後唔再製造冇錢冇得救慘劇！