高鐵可算係近幾日最熱門話題，泛民係咁「拉布」拉到悶，但最後兩日會議旅遊界議員謝偉俊（Paul）大戰公民黨同「拉布之王」社民連，相信大家都睇得好興奮。可能好多人都覺得奇怪，點解之前比較靜嘅阿Paul會忽然激進？原來阿Paul決定今年要做企硬派，多發言多表達意見，點都唔肯再畀人抽秤話功能組別出身就唔係稱職議員。
阿Paul話由今年起，喺議會遇到不滿事都會出聲，早前佢認為立法會調查甘乃威只會浪費公帑，就挺身提出終止調查動議，但最後都被否決。雖然出師未捷，不過阿Paul愈戰愈勇，今次大鬧「拉布」議員令人刮目相看。阿Paul直斥「拉布」只係兩黨為嚟緊嘅補選造勢，手法低劣。
不過大家唔好唔記得，阿Paul紅顏知己白姐姐都揚言會參加補選，阿Paul咁搏命單挑，係咪為咗幫白姐姐吸多啲票，真正原因真係得佢哋兩個先知嘞！