不過知情人士尋日就解讀話，今次聲明反而釋除咗部分建制派嘅顧忌同疑慮，變相為建制派瞓身全力參選開綠燈，估計各個建制黨派之後嘅選舉協調工作將會加快，以汰弱留強作為篩選原則，勢要派出最強陣容、爭取每區協調一個候選人出戰，粉碎公社兩黨嘅所謂「公投」行動。

無後顧之憂 瞓身出戰

根據公社兩黨早前公布嘅勝負準則，如果補選整體投票率超過五成，即表示「變相公投」有效，雖然呢個準則只係佢哋自行訂立、冇任何法律約束力，但令部分建制派感到兩難，擔心如果精英盡出參選，瞓身谷行班支持者出嚟投票，變相會增加咗泛民口中嘅「變相公投」嘅代表性。

今次中央嚴詞聲明點都唔承認兩黨嘅運動係「公投」，即係話即使最終補選投票率超過五成都冇問題喇！喺呢個形勢下，據聞建制派打算喺最有機會撼低泛民嘅新界東、新界西同九龍東選區，由擁有最強大選舉機器嘅民建聯與工聯會出戰，派出最強嘅人選出選。民建聯堅持喺新界東及新界西出選，以免重蹈覆轍，因為當年支持葉劉淑儀參加港島區補選，而流失咗二萬票。至於前九東票后嘅工聯會陳婉嫻想清清靜靜繼續退休？相信都好難囉！據聞嫻姐喺有力人士游說下，好大機會東山復出，再戰江湖。

有意同民建聯爭過出戰新界東嘅新論壇龐愛蘭同新界西自由黨田北辰，據有份協調建制派陣營嘅人士話，目前仍在盡最大努力對佢哋進行游說工作，希望佢哋顧全大局，知難而退。