最搞笑嘅仲係，所謂公投嘅成敗關鍵視乎投票率有幾多，超過五成叫做成功，少過五成叫做失敗。問題係，建制派假如睬你都傻，懶得發動群眾投票，公投多數失敗；建制派假如積極參與，大力鼓吹票倉幫拖，公投多數成功。好嘞，公投成功唔代表泛民成功，因為結果有機會係建制派贏到議席，五個辭職嘅泛民議員之中隨時有一個兩個補選失敗，你話係幾咁尷尬！

由於成件事十足鬧劇，所以唔蠢得晒嘅民主黨一向唔贊成，黨鞭司徒華甚至批評公投邏輯混亂，換言之，泛民內訌。內訌都算嘞，更加荒誕不經嘅場面又出現，創黨主席李柱銘居然搞搞震咁話，民主黨唔贊成吖嘛，好，搵幾個志同道合破壞王另起爐灶撐公投！

喂喂喂，咁嘅叛變行為，算唔算出賣民主黨呀？李柱銘做得漢奸多，莫非今次想搞搞新意思，兼職做一做黨奸？唔知點解，忽然諗起台灣嘅李登輝，呢個台獨無間道不斷出賣國民黨，結果成為第一個被掃地出門嘅前黨主席。眼見李漢奸忽然做咗李黨奸，民主黨大概有必要認真考慮踢敗類出黨。

唉，做賣國漢奸好過癮嘅咩？做賣黨叛徒好得意嘅咩？真係唔覺囉，功夫茶淨係知道兩條做人處世大道理：出得嚟行，預咗要還；做得漢奸，預咗悽慘。

話時話，山東榮成市有一座別開生面嘅「奸臣紀念館」，裏面豎立中國歷史上十二個奸臣嘅塑像，例如秦代嘅趙高、唐代嘅來俊臣、宋代嘅秦檜、清代嘅和珅、近代嘅汪精衞等等。遊客可以穿上官服，敲響驚堂木，怒審眾奸臣。審都唔止，仲可以打，遊客攞起一碌棍，兜頭兜腦扑落去，奸臣跪像識得發聲慘叫求饒o架！

計功夫茶話齋，館長可以考慮為賣國賣黨嘅李漢奸造像，湊足十三奸臣，任得同胞痛打。

講真，只要睇睇汪精衞，你就會知道漢奸嘅下場有幾可悲。一九四四年，賣國求榮嘅汪精衞健康惡化，急送「宗主國」日本求醫，最終死於名古屋帝國大學醫院。真正死因係乜？十年前汪精衞被鐵血鋤奸團刺殺受傷，子彈並未取出，鉛毒體內擴散。換言之，汪精衞係間接被刺殺身亡嘅。一代漢奸話自己嘅所作所為係「曲線救國」，結果死於「曲線遇刺」，你都咪話唔諷刺。

死於子彈鉛毒夠慘咩？未算，汪精衞遺體葬於南京梅花山，一九四六年，國民黨陸軍總司令何應欽決定將汪墳炸毀！炸完墳仲要燒屍！燒完屍仲要開動強烈鼓風機將骨灰吹向茫茫夜空！

講番李漢奸呢一筆另起爐灶撐公投，或者可以咁諗，老而不死是為賊，賣國賊自覺時日無多，希望盡地一煲最後掙扎，搞亂香港就可以向洋主子交代啦嘛。所以咯喎，理得你所謂公投係咪混帳，總而言之搞亂檔。

點都好啦，多行不義必自斃，惡有惡報，時候一到，一切都報。呢頭做漢奸，嗰頭做黨奸，千祈唔好唔記得汪精衞死無葬身之地嘅下場！