「鬍鬚曾」曾俊華下月發表預算案，姿勢重於實際，繼上年首次出版預算案諮詢漫畫之後，今年再炒冷飯推出「今日工程，明日繁榮」漫畫三萬份，兼送個人卡通形書籤。據新聞稿介紹，上年嘅漫畫主角日仔，今年繼續奇妙時空旅程，需要面對一個殘局，要着手整頓，作出抉擇。乜原來鬍鬚曾都知道香港嘅經濟已經被佢搞到殘晒，依家剩低殘局一個㗎？我哋仲以為佢唔知添！
鬍鬚曾尋日以書面回覆立法會質詢時，搬三個世界級經濟學者出嚟，指外界預測美國經濟今年表現堪憂，意圖印證雙底衰退論，等佢可以大條道理推出一份唔派糖嘅預算案。三位學者之中，克魯明同斯蒂格利茨都係諾貝爾經濟學獎得主，另一位費爾德斯坦係哈佛大學教授，鬍鬚曾抬佢哋出嚟，無非想唬嚇香港人。
不過，鬍鬚曾似乎好夾硬嚟喎，正如佢自己引述斯蒂格利茨同費爾德斯坦所講，兩位學者均認為「美國經濟喺今年出現強力復甦嘅機會好細」。強力復甦機會好細同經濟衰退兩個概念差別好大，唔通鬍鬚曾想混淆視聽？香港有咁嘅財爺，經濟想唔殘都幾難！