平機會前主席鄧爾邦被踢爆鬼祟離任，政府尋日即刻補鑊宣布委任前特首辦主任林煥光接棒，不過唔少立法會議員都狠批煲呔曾又係益自己友，製造「AO治港」嘅美麗神話，當中包括早前捲入涉嫌求愛不遂怒炒女助理風波嘅民主黨立法會議員甘乃威。不過甘威一諗起佢同林煥光嘅「共同經歷」，就立即收火唔再插，實行曲線護己。
甘威本來都話好擔心「AO治港」嘅文化會日益嚴重落去，最後搞到所有半官方機構都成為前高官俱樂部，變相無咗應有嘅獨立地位，又狠批煲呔曾想自建馬房嘅意圖愈嚟愈明顯。
不過，一提到林煥光嘅婚外情醜聞，可能令人質疑佢唔適合處理女性性騷擾嘅投訴時，甘威好尷尬咁收口唔鬧，仲掉番轉頭撐林煥光，吞吞吐吐咁指婚外情只係林嘅私人事務，相信唔會影響林嘅工作表現喎。用同一把尺去量度，即係話有人涉嫌求愛不遂怒炒女助理，都唔會影響工作表現喇。