立法會尋日動議辯論釋放異見人士劉曉波，遭建制派議員「冷處理」，惟獨專業會議梁美芬神勇發言，表明唔認同立法會就內地事務進行表決喎。點知火爆嘅社民連陳偉業發言時大鬧建制派做逃兵，又叫「有啲教狗屎法律嘅人」要先搞清楚法律問題。成個議會只得一位議員喺大學教法律，梁美芬自然感到冒犯要求主席裁決。
主席宣布休會，重聽之前錄音聲帶，廿五分鐘後恢復會議。主席裁決話，雖然陳偉業有關言論含有冒犯性，但並無指明邊位議員，所以無違反議事規則。梁美芬對裁決大表不滿，認為含沙射影係毋須要指名道姓嘅，即時與何鍾泰、石禮謙、劉秀成、謝偉俊及黃宜弘離場抗議，並聯署去信主席表達不滿。
梁美芬離場後眼濕濕話，陳偉業嘅冒犯性言論誣衊其個人專業，矛頭更指向主席裁決不公平，佢話：「議會之所以有人掟嘢同講粗口，唔多唔少都係主席一手造成，執行議事規則過於寬鬆，裁決有雙重標準！」