本文重點
教育局副局長陳維安（Kenneth）第一次代表局長孫明揚，飛去英國出席教育部長會議，出席主題為「Learning and Technology」嘅論壇同埋英國教育科技展，仲不忘同當地嘅香港留學生食飯見面。Kenneth發現，依家一般香港留學生選科太過現實，勉勵佢哋喺廿一世紀應該放眼世界。
呢次論壇圍繞廿一世紀學生應具備嘅技能，Kenneth話會上大家認為廿一世紀唔止要求專業技能，而係要學識終身學習。佢話依家一般香港留學生過於現實，最鍾意揀法律、醫學、營養等專科，希望學生選科唔係搵食至上，應該要放眼世界。
楊哲安處男落區
人在英國，Kenneth同留學生食飯都不忘揀間中菜館，選擇到倫敦杜莎夫人蠟像館附近嘅中菜館食中餐，印象最深嘅菜式，原來係日本芥末蝦餃，佢話呢隻蝦餃皮係綠色，仲有日本芥末味道，喺香港食唔到，但當地中菜始終不及香港精緻。
Kenneth不在港，教育局政治助理楊哲安尋日處男下海落區見基層學童家長，唔少家長向佢表達將上網費納入書簿津貼等期盼，楊哲安唔敢開空頭支票，話要返去研究。