繼早前炮轟煲呔曾推出慳電膽消費券有違法治精神後，沉寂咗一段時間嘅平叔講起「八十後」激進嘅一群時又再度發炮，矛頭直指煲呔曾領導嘅特區政府以及同為「八十後」嘅衞生及福利局政治助理。平叔一針見血話，「八十後」年輕人有多達一百萬人，部分人以激進手法表達意見，原因係政府未有解決年輕人嘅出路。平叔批評，政府推銷政策經常天花龍鳳，一味口號式話「為整體經濟」、「為整體市民利益」，談整體多過談個體，忽略了年輕人訴求。

寸爆陳智遠

究竟如何聆聽年輕人訴求呢？平叔話鋒一轉，將矛頭直指政府嘅「八十後」高官無做好應有角色：「政府應該多啲同八十後班年輕一代溝通，政府好多AO（政務官）都係八十後，又好似陳智遠都係八十後啦，好應該出去同啲八十後溝通吓，了解年輕人嘅需要嘛！」平叔仲寸爆話，政治助理有十三萬月薪又使乜激進吖！

平叔口中嘅另一個深層次矛盾，就係長年未解決嘅貧富懸殊問題。平叔話，貧富懸殊令基層市民怨氣增加，加上政府處事經常被指官商勾結，怨氣就會愈積愈多，容易被「八十後」激進情緒影響，激發上街示威不滿政府，分分鐘愈搞愈大，引發管治危機，到時仲更加麻煩。佢認為，政府一日唔妥善解決貧富懸殊同年輕人出路問題，激進嘅「八十後」隨時變成計時炸彈，爆起來唔係講玩！

政府目前為爭取立法會通過高鐵撥款搞到裙拉褲甩，平叔就大潑冷水話：「高鐵撥款過到又點吖，遲吓又有泛民主派五區總辭，睇怕有排搞囉！」離開咗政府，平叔講嘢果然輕鬆暢快好多！