全國政協常委楊孫西公子楊華勇不但手車夠辣，原來仲好食得辣，自詡為「高級組辣王」，最愛光顧灣仔駱克道高華大廈間「四姐川菜」。華勇最鍾意食「四姐」嘅「四川涼麵」及「重慶口水雞」，前者貪佢辣得嚟帶少少酸味夠晒醒胃，後者則麻辣味十足，滿足佢嘅勁辣要求。佢話邊歎川菜邊飲可樂，辣氣攻心，感覺更刺激！
華勇為福建人，估唔到好辣作風不遜於四川人，但佢話自己愛辣程度唔及家姐，事關家姐出街食飯例必自備私伙辣醬，無辣不歡。不過，食辣嘢都有煩惱，口腔熱氣生痱滋只係小事，華勇話最怕食完川菜後去同朋友約會，皆因腸胃辣到反轉，必定會拉肚子，認真尷尬。
「四姐川菜」屬會員制私房菜，每位收二百蚊，有六款菜式任揀，深受名人歡迎入會捧場，全憑秘製辣油，而且好多食材都係由四川新鮮運到，當然唔少得老闆四姐嘅精心烹調啦！四姐仲爆料話，華勇仲鍾意食「蒜泥白肉」，事關白肉（五花腩肉）切得好薄身，肥肉入口即融，想食肥肉但又怕肥嘅人就啱晒嘞！