尋日嘅會面喺灣仔君悅酒店舉行，名人二代傾巢而出，好似恒基地產副主席李家傑、理文造紙行政總裁李文俊、信置執行董事黃永光、大新銀行主席王守業兒子王祖安、福建幫頭領楊孫西囝囝楊華勇、莊氏國際執董莊家彬、霍家第三代霍啟剛、華置執董劉鳴煒、世茂集團副主席許世壇、英皇集團主席楊受成囝囝楊政龍、已故全國政協副主席安子介外孫楊鼎立、香港青聯主席陳仲尼及菁英會主席施榮忻等。

年紀輕輕嘅楊政龍話，啱啱返港幾個月，依家仲係學習期。 （霍振鋒攝）	左起：馬雲、陳仲尼及施榮忻一齊出席活動。 （霍振鋒攝）	黃永光、白富鴻、吳小莉等都係座上客，仲有青聯新進、王守業嘅公子王祖安。 （霍振鋒攝）

李家傑搵馬雲談心得

恒基副主席李家傑做祖業做得有聲有色，不過佢好謙咁歸功於「好彩」兩字。佢話自己算係早打入內地巿場嘅生意人，所以識人多啲，機會多啲。不過事業上咗軌道，佢一樣關心後生仔，好似今日佢會以百仁基金名義搞個論壇，搵嚟老友阿里巴巴主席馬雲同大家分享創業經驗。

陳仲尼介紹青聯新進畀卓妮認識，佢就係喺美國從事管理投資基金十年嘅王祖安，返港後自創天愛國際，投資房地產同未上巿公司，年終無休嘅佢，每日開足廿四小時工，佢話呢啲係香港精神，加上唔想浪費喺美國十年經驗，所以寧願自己創業，無諗過返大新銀行。

一手幫爸爸李運強搞理文造紙嘅李文俊就話，九四年返內地發展，由於兩地文化唔同，返內地做生意都唔易，畀人呃咩都試過，絕對唔係行平路，不過佢自認算幸運，早啲返內地發展，機會都多啲。佢寄語後浪：「成功在堅持！」

楊政龍拒開空頭支票

呢班二代之中，楊政龍（Alex）相信係最年輕嘅一個，今年只得廿三歲。Alex由美國波士頓大學畢業後，返咗嚟香港幾個月，依家係英皇企業行政主管。佢好謙咁話，加入菁英會同香港青聯幾個月，依家係學習期，無論做公職定係幫自己公司做嘢，都唔會衝動逞強開空頭支票；睇佢虛心受教個樣，就證明八十後一樣好成熟、好穩陣！

卓妮