12/01/2010

播放本新聞相關短片

中環耳目:胡郭秀萍喜葡式沙甸魚

葡國菜唔係獨沽一味只得葡國雞,原來葡式炸沙甸魚一樣好醒胃。合和實業主席胡應湘嘅夫人胡郭秀萍係葡國菜迷,開餐指定去合和中心對面QRE PLAZE嘅葡國餐廳「Nino's Cozinha」,每次例必點番味葡式炸沙甸魚,佢話煮法獨特,唔係好多地方可以食得到。

胡太一向飲食清淡,即使冬天想食火鍋都係買蔬菜返屋企炮製,保證煮法少鹽少油,但講到一味葡式沙甸魚,佢就抗拒不住誘惑,每次去「Nino's」例必點番一客三條沙甸魚,再來多一碟沙律及白酒煮蜆。

煮法自成一派 滿室飄香

Nino's煮沙甸魚有妙法,老闆柯先生原來係中葡混血兒,自細食秘製葡國菜長大,鑽研廚藝自成一派。佢將沙甸魚由葡萄牙空運到港,專挑魚身五至六吋長嘅,肉質最嫩口。揀好靚魚後就以鹽及胡椒烤焗,再加入檸檬、青橄欖及黑橄欖,魚肉混和檸檬香氣,滿室飄香。

卓妮