美國安格斯 煮法簡單

安格斯牛扒出晒名好食，肉質和紋理細緻，脂肪如大理石紋均勻分布，可以話係市面上最鮮嫩嘅牛扒，一試就知道不同凡響。講到安格斯牛扒，其實澳洲及加拿大都有出產，但許漢忠就話，首選都係美國最靚。靚牛扒買咗返屋企又點煮呢？許漢忠話，咁靚嘅牛扒毋須再特別烹調，只要灑幾粒鹽，放落平底鑊煎兩煎就可上碟，佢覺得咁整法最好味；問到幾成熟，佢話自己就鍾意煎到一半半就收火，即係五成熟咁上下。

卓妮睇番許漢忠買嘅美國頂級安格斯牛扒個價錢牌，七十六元一百克，兩塊扒就要三百多元，但許漢忠話物有所值，因為到餐廳食呢隻牛扒就肯定唔止呢個價錢，可能貴一倍都唔出奇。不過，對於許漢忠來說，價錢都係其次，相信最重要係同愛妻喺屋企煮飯仔兼撐枱腳，呢啲真係多多錢都買唔到㗎！

自許漢忠離開港龍後，喺機管局轉眼做咗九年。講開又講，最近經濟動力牽頭搞「工商界政改動力」，搵咗一百零八個工商界人士做發起人，許漢忠都係發起人之一；早前香港友好協進會搞「港區人代政協活動日」，北上深圳搞哥爾夫球比賽，身為高球發燒友嘅許漢忠雖然唔係人大、又唔係政協，都有北上同埋好友林健鋒、梁君彥等打番場友誼波；每年嘅聖誕節，佢仲拉埋班好友去機場客運大樓唱聖詩，搞搞聖誕氣氛添，今年亦都如是。

美國安格斯牛扒肉質和紋理細緻鮮嫩，脂肪如大理石紋均勻分布。

卓妮上周喺中環IFC間city'super撞到許漢忠。

卓妮