呢嗱，話口未完，油麻地廟街尋晚又發生高空投擲腐蝕性液體事件，最少三十人中招，簡直令人不寒而慄。

鏹水彈空襲爆完一單又一單，變態狂徒到依家連影都未見。當局舊年年中係威係勢，喺旺角裝咗八部天眼攝錄系統，最近又搵埋民政事務總署、警方同機電署一齊檢討成效。

跨部門小組咁大陣仗，檢討結果仲誇張。原來攝錄系統有好多盲點，錄影質素又差，完全係得物無所用，根本無助緝兇，即係話，裝天眼嘅一百七十萬公帑等於揼落鹹水海，唔怪得鏹魔愈來愈猖狂喇。

先聽警方點講，佢哋話喎，天眼成日發雞盲，如果光線唔夠，拍到嘅影像就會矇查查。照咁講，鏹魔咪愈夜愈快樂？晚上八、九點，正係行人專用區最旺嘅時候，揀嗰陣掟樽鏹水落去，天眼拍唔到兇徒個樣，警方點拉人，點破案呀？

機電署檢討結果仲搞笑，原來佢哋希望啲影像唔好太清晰，朦少少就啱晒，理由係為咗「保障私隱」喎。簡直九唔搭八，市民安全同保障私隱，到底邊樣緊要呀？如果要保障私隱，咁不如唔好裝天眼喇，笨！

睇唔清都未算，至弊好多地方連睇都睇唔到。機電署話，天眼裝喺固定位置，只能覆蓋某個範圍嘅全景，加上附近招牌林立，樓宇有高有低，遮住咗鏡頭，留低唔少盲點，如果鏹魔搵呢啲死角位置犯案，警方完全冇符。你話喇，咁嘅所謂閉路電視監察系統，同患白內障有乜分別？

仲有更怪雞㗎，機電署又發現，附近啲大型燈箱晚間發出嘅強光，會令天眼拍攝範圍光源差異增大，影響影像質素。咁就奇嘞，警方話光線唔夠拍唔清，機電署又話光過頭唔掂，咁究竟喺乜環境至啱㗎？

如果仲有下次檢討，使唔使叫埋醫管局加入跨部門工作小組，搞清楚天眼到底係患咗青光眼、夜盲症，定係白內障吖？真係唔掂，就要諗其他辦法，咪再浪費公帑嘞！

話到尾，天眼變成空擺設，裝咗等於冇裝，發揮唔到緝兇作用，係因為當局對鏹水彈威脅並冇足夠重視。每次出事之後，煲呔曾例牌扮晒嘢去現場做吓「視察騷」，當局亦會循例增加懸紅金額，但跟住就冇咗件事。迫於輿論壓力，當局喺旺角首宗鏹水彈空襲發生半年之後，至陸續喺案發現場附近裝閉路電視，但對於系統存在嘅問題並冇搞清楚，更加冇向公眾交代，根本就係敷衍市民。

當局打擊不力，高空擲物個案愈來愈離譜，鏹魔逍遙法外，早排過海去銅鑼灣打游擊，依家又喺油麻地蒲頭，搞到市民人心惶惶，步步驚心。計功夫茶話齋，家陣裝天眼變咗天冇眼，信港府不如靠自己，大家都係自求多福實際啲。