飲食界立法會議員張宇人（Tommy）尋日出席九龍城美食節開幕，受盡美食誘惑，全場三十二檔美食攤檔，琳琅滿目，以Tommy嘅天生為食個性，大家估吓佢狼吞咗幾多食物落肚？答案係：兩粒魚蛋同一杯奶茶。
兩粒魚蛋？識得Tommy嘅人可能會以極之質疑嘅語氣嗌出嚟：「真唔真呀？」珍珠都無咁真！美食節嘅檔主，唔少都係Tommy嘅選民或者準選民，所以Tommy逐檔「拜票」，檔檔都去打招呼，其中一檔仲有佢最鍾意食嘅甜品杧果黑糯米，大家以為佢一定幫手消耗現場數以磅計嘅食物，點知佢話只係食咗兩粒魚蛋，飲咗一杯奶茶咁大把！嗰兩粒魚蛋，仲要係一粒因為攤檔職員拮畀佢，唔食唔好意思；一粒用嚟喺檔前擺甫士影相，為免浪費先至放入肚。
點解Tommy咁忍得口？Tommy話，無計！為咗身形好啲，見到心愛嘅杧果黑糯米都要當睇唔到，急步離開，減少被誘惑風險。所以話，為靚乜都得，唔係女人嘅專利㗎！