本文重點
旅遊發展局主席田北俊嘅任期三月底屆滿，由於政府未宣布再委任田少，最近風聲四起，又傳海洋公園主席盛智文有機會接棒，又傳經濟動力林健鋒吼實呢個位。田少尋日上電台忍唔住呻幾句，話最近同旅發局開會討論今年中旅遊推廣大計時，因為唔知下屆主席誰屬，好多決定都落實唔到；佢話如果政府再拖拖拉拉，就會拖慢工作進度。
政府對委任旅發局主席問題拖拉，對閂旅發局水喉就好決絕，搞到旅發局要動用幾千萬元儲備，田少尋日開聲呻窮，叫政府唔好再減撥款，否則旅發局嘅歐美辦事處隨時要降呢做「代辦」，即係搵個人做代表就算嘞，暗示宣傳少咗只能怪政府。
被指有機會接棒嘅盛智文尋晚就話，政府無人搵過佢，佢只想幫香港保持旅遊「一哥」地位，而佢嘅海洋公園主席任期至二○一二年，公園正進行擴建工程，佢一切以海洋公園為首要考慮！扮嘢文又話，自己身兼西九文化區董事局成員，工作好忙；如果政府搵佢幫手，真係要坐低慢慢傾。
田二少誓爭補選出戰權
講開田北俊，佢細佬田北辰尋日踩落新界西選區石籬邨，力撐自由黨第二梯隊搞嘅盆菜宴，仲即場獻唱《舊歡如夢》。二少話，自由黨一直相信直選，之前佢有機會參選功能組別都唔去；如果可以為黨出力，佢一定參加五區總辭補選，落邊區選就等黨決定，睇嚟田二少誓要爭親中陣營補選出戰權。