民主阿婆原定參加元旦遊行，但據聞撞啱老公陳棣榮因十二指腸潰瘍舊病復發再次入院，所以最後冇露面。不過，以民主阿婆長年累月鍥而不捨出嚟攪局嘅脾性，又點會咁易罷休？最近五區總辭嘅鋒芒畀班反高鐵嘅「80後」年輕人蓋過，民主阿婆又係時候露面攪局。

管治失效 社會分化

民主阿婆食住最近好興嘅「80後」話題，借力打港府，話最近反高鐵等連串社會運動，歸根究柢，係政府施政出現問題，高官問責制徹底失敗，港府無法高效管治，情況仲反映咗市民不滿港府嘅政策向部分人傾斜；如果問題唔解決，社會只會更加分化。

民主阿婆一開口就鬧到停唔到嘴，佢又抨擊港府無恪守一國兩制、高度自治，對北京馬首是瞻，最諷刺係煲呔曾早前上京述職，被當面訓示要解決香港社會深層次矛盾，搞到乜都綁手綁腳，淪為跛腳鴨政府，可見一國兩制褪色或者根本落實唔到兩制。民主阿婆奉勸港府重新爭取港人信任，多聽異見，唔好當政黨係食人猛獸；佢仲話，最近連串社會運動，反映香港社會愈嚟愈成熟，港府必須相應提高施政質素。

高鐵撥款一再被押後，港府已經夠晒弱勢，民主阿婆揀喺呢個時候出嚟鬧政府，仲鬧到咁肉緊，拳拳到肉，好似驚死煲呔曾死唔去，要趁佢病踩多兩腳，相當狠毒，睇嚟呢對過氣姊弟嘅性格真係好相似！