立法會調查民主黨甘乃威炒女助理事件嘅委員會，本嚟只得梁劉柔芬（Sophie）、林大輝、劉江華同梁美芬報名，不足法定人數嘅七人，搞到尋日開內會時，建制派要即場提名，終勉強湊夠數，其中自由黨方剛同工聯會潘佩璆更加係唔嫁又嫁，扭擰得嚟相當搞笑。
查甘委員會報名反應冷淡，建制派議員三催四請都唔報名，早前仲有傳自由黨同工聯會決定，點都唔落疊派人加入，不過，結果又係另一回事。建制派尋日喺內會互相提名，一開始黃宜弘就提名方剛，然後黃國健提名潘佩璆，林大輝提名陳健波。方剛表現出一幅不情不願嘅樣子，於是大家上演一幕黃袍加身，旁邊嘅Sophie勸方剛話：「算啦，接受啦！」梁君彥則笑方剛：「哎呀，面有難色啊！」方剛支支吾吾，最終接受。
事後，方剛走出立法會走廊，對住記者「伸冤」，聲稱事前完全唔知會被提名，今次係被人屈，仲笑住話：「黃宜弘害人一次，我會記住佢，我會報仇！」方剛唔嫁又嫁，嫁咗又怨；如果佢真係唔想，睇怕十個大漢都抬唔到佢上轎。