啟剛同卓妮傾起佢最愛嘅「辣店」，佢首推位於灣仔大王東街嘅國際咖喱館，最愛菜式係乾炒咖喱雞，佢每次嚟幫襯，仲必定打包帶走，好似名牌快餐店嘅「麥麥送」咁，不過佢就係拎番屋企同媽咪分甘同味。

啟剛（圖）有食餃子嘅習慣，唔知同北方女友郭晶晶有無關呢？ （資料圖片）	呢碟乾炒咖喱雞係啟剛嘅至愛，盛惠九十元。	國際咖喱館充滿小店風情，吸引唔少名人食客。 （何偉鴻攝）

得天獨厚 皮膚愈食愈滑

好多人話食得辣多會「爆瘡」，啟剛愈食辣皮膚反而愈滑，怪唔得可以肆無忌憚每月歎二次勁辣咖喱。啟剛早前以菁英會副主席身份出席聯歡宴，自爆係「勁辣王」，佢話早前從朋友口中打探到國際咖喱館，即一食上癮。不過啟剛始終係公眾人物，國際咖喱館賣嘅係美食唔係裝修，地方唔算大，啟剛唔方便坐低大吃大喝，所以每次光臨只會買外賣，順便孝敬埋阿媽。

啟剛話，佢仲非常喜歡食餃子，尤其係韮菜豬肉餃，每次至少勁食十隻，口味咁似北方人，怪唔得佢同女友郭晶晶咁夾囉。

講番國際咖喱館，喺咖喱界相當有名，高官明星都係捧場客，好似教育局局長孫明揚及太太、周星馳同星媽、劉天蘭、杜琪峯、何超儀等都係fans。佢咁巴閉有原因嘅，老闆蘇子健話，佢煮咖喱雞有秘方，雞除咗用咖喱粉醃之外，仲落埋花旗參粉、丁香、甘草同沙仁，丁香同花旗參有清熱同消炎作用，食咗唔會咁熱氣，加沙仁就可以保護胃部，所以食完佢哋嘅咖喱無咁大口氣又無咁燥熱，難怪咁多人食過之後翻尋味！

卓妮