不如講講點解要換車房先吖。舊年喎，一個月內先後有三名病人送院期間由於白車死火而受阻，病人最終死亡，雖然死因庭裁定三名事主死於自然，但係法官點名批評，為救護車維修嘅機電署檢查不認真，署方撰寫嘅維修報告不可信，所以就提議消防處唔好再幫襯機電署嘞。

至於點解要換人頭，大家都知啦，最近石油氣的士小巴出現集體死火事件，原因可能同中石化嘅產品出咗問題有關，從而揭發一個絕頂荒謬嘅官場怪現象，原來機電署係從來都冇抽驗車用石油氣o架！到咗家陣風頭火勢，諗住臨急抱佛腳抽取樣本化驗啦，原來機電署係冇化驗人才o架！唔止冇人才，原來機電署連取樣容器都冇o架，焗住要去惠州借！

唔知大家點諗，功夫茶就覺得十分滑稽。機電署理論上應該係全香港最信得過嘅頂級專家，莫講話維修白車咁簡單吖，照計維修火箭都難唔到佢哋。之不過事實上竟然係，白車呢頭維修完，轉個頭即時跪低，否則法官都唔會開炮狂轟啦。

好嘞，機電署一來唔識改善白車死火問題，二來咯喎，又輪到的士小巴頻頻死火搞到束手無策，所謂頂級專家居然唔識點樣抽驗車用石油氣。唔好唔記得，死火問題其實早於去年十一月已經有人向署方反映，可惜吖，拖拖拉拉兩個幾三個月至今依然無法查明真相。

吖，講開又講，仲記唔記得大埔富善邨墮事件？有一部升降機喎，嘭一聲，直墮槽底。喂，恐怖成咁嘅「升降機笨豬跳」，關邊個事呀？唔好意思，又係機電署。

講到呢度，不如等功夫茶做一個小結：機電署監管不力，屋邨墮；機電署監管不力，白車死火；機電署監管不力，全城死火。咦，乜唔係的士小巴死火咩，點解係全城死火？冇辦法，交通係一個社會嘅動脈，動脈唔暢通咯喎，梗係全城死火啦！

你話吖，呢啲係咪叫做失職先？頻頻失職嘅機電署係咪應該換人頭以謝天下先？

如果真係要換人頭，計功夫茶話齋，最佳人選有兩個，第一個當然係署長陳鴻祥，第二個就係副署長陳帆。話時話，死火風波愈搞愈大，陳鴻祥好似從來冇蒲過頭喎，來來去去都係陳帆以署理署長身份出嚟左噏右噏，署長大人去咗邊呢？你唔好話畀功夫茶聽，陳鴻祥掛住放大假，理得你的士小巴係咪死完又死。

講開陳帆，呢條友仔都幾過癮，佢話喎，政府車輛部分都係用石油氣，仲係幫襯中石化，冇死火喎，可能行車里數少就冇事，行車里數多就出事。功夫茶贈佢一句，唔好玩啦，人哋的士新車落地照樣死火呀，講嘢咁無厘頭，莫非想自動獻身換人頭？