五區總辭如果成事，唔少建制派都想派人出選，為嘅係立法會議席，或者試票練兵。有消息指中聯辦有意再次撮合親建制嘅沙田獨立區議員龐愛蘭同自由黨，助自由黨前主席田北俊今次喺新東出選，而龐愛蘭就會喺二○一二年嘅立法會選舉喺新東排第一名參選。
對於呢個其實目的都係為咗擺平各方勢力嘅「建議」，前排我哋撞到龐愛蘭，佢話短期內都唔會加入任何政黨，又話自己總結○八年嘅選舉經驗，其實係輸在起步太遲，所以依家已經早有準備，又諗定招數應付泛民嘅告急戰略，好大機會參選。
除咗自由黨同龐愛蘭，沙田區嘅民建聯區議員葛珮帆都躍躍欲試。新界東被視為喺補選中建制派較有機會奪得議席嘅一個選區，所以唔想白白浪費呢個機會，不過最終邊個出選，唔到最後一分鐘，都仲可以變。