立法會議員涂謹申上月中旬迎娶蘇麗芬之後，一對新人去咗澳洲度蜜月，玩足十一日至返嚟。阿涂話最開心係日日瞓到自然醒，唔使校鬧鐘，連平時Blackberry不離身嘅老婆，都將部手機拋到九霄雲外，睇怕呢樣都係阿涂度蜜月嘅最大收穫嘞。
阿涂呢趟去咗正值夏天嘅澳洲墨爾本，兩公婆喺香港過慣城市人嘅生活，所以今次行程設計都幾返璞歸真。包括去農場摘士多啤梨、酒莊試酒，又去動物園探樹熊，玩得好盡興。阿涂仲好雀躍咁講述喺士多啤梨園摘果嘅過程，直嚷咁大個仔從未試過。查實新界上水都有即摘即買嘅士多啤梨園，下次佢想再體會農家樂，兩公婆可以考慮吓唔使買機票去到咁遠。
阿涂四十幾歲人膝下猶虛，好多朋友都關心佢幾時「造人」。被問及生仔大計，原本講到口沫橫飛嘅阿涂當堂怕晒醜，口窒窒話生仔要有詳細嘅共識至得！