江媽身體好硬朗，睇落最多七十歲，唔怪得Susie保養得咁好啦，原來係得益於遺傳。江媽側邊有位混血靚女，全程細心照顧老人家，有時仲講得兩句台灣話，呢位靚女正係Susie嘅寶貝女兒白心怡（Jennifer）。

自助火鍋嘅魚、肉、菜，都係咁新鮮。

竹筒上嘅魚滑，賣相夠特別，係Susie至愛。

囡囡回港發展

卓妮早前聽Susie講過，佢同洋人前夫所生嘅囡囡喺美國做時裝行業，仲彈阿媽着衫老土添！Susie提起時有種「吾家有女初長成」嘅喜悅。Jennifer依家喺紐約做時裝騷搞手，佢話媽咪希望佢返港發展，所以佢今年會「回流」。到時香港社交圈就多咗一對靚靚母女花啦！

講番今次開飯嘅御苑，原來係Susie嘅熱門蒲點。呢度每逢十二月到春節前，特別提供「一人一爐」火鍋自助晚餐，勁受歡迎。Susie平時唔係幾鍾意打邊爐，但係每年入冬必定嚟呢度擦餐勁，一星期至少嚟一次。

御苑經理Gary話畀卓妮聽，佢哋十年前第一次做火鍋，諗住搞吓氣氛、應吓節，點知會員反應奇佳，第二年冬天見唔到有火鍋食，大家都「嚴重關切」，於是索性將佢變成常態。

Gary又話，佢哋啲食物勝在新鮮，貴價入口海鮮例如美國筒蠔、象蛂蚌、鮮鮑仔、東星斑片等，無限量供應，更重要嘅係食物絕對唔留過夜，所以成本好高，幾乎無錢賺咁滯，至緊要會員食得開心！

嗰晚Susie揀咗茅根粟米馬蹄湯底，夠晒正氣。佢最鍾意蔬菜同埋海鮮，貪佢夠新鮮，其中生蝦、鮮帶子、魚滑都係至愛。美食當前，仲有婆孫三代親情搭夠，人生夫復何求？

卓妮