早兩日之嘛，本報揭發灣仔會展舉行嘅第七屆冬日美食嘉年華出現蠱惑海味檔，擘大喉嚨高叫「二十蚊，買一斤送四両」，以非常誤導嘅手法魚目混珠，令人以為係二十蚊一斤，實際只係二十蚊一両。當你以為劏客行為被踢爆之後，奸商會收斂啦，點不知喎，一雞死一雞鳴，反而變本加厲。

事隔一日，又有市民投訴，再有蠱惑海味檔將顧客當係羊牯。有一位懷疑受騙嘅李小姐係咁講嘅，去展銷會打算掃平貨啦，見到有一檔賣海味嘅人頭湧湧，標價一百八十蚊一斤花膠，心諗幾抵買喎，就買咗一斤。之但係，返到屋企用水一浸，嘩！所謂花膠居然發出一陣陣惡臭，直情好似麥皮渣咁，明顯係假貨。李小姐就話嘞：「無諗過喺咁大型嘅展銷會都會買到假貨，仲衰過街邊嘅攤檔！」

另外又有一位蘇太，見到攤檔職員推銷一千二百蚊一斤魚翅，又係心諗幾抵買喎，於是即場將小部分魚翅浸水，測試發大情況，最終以六百蚊買咗半斤。哈，拎到返屋企居然好似變魔術咁完全唔同晒，半斤魚翅淨係見到一排翅骨，翅毛都冇條。蘇太懷疑有人包貨嘅時候做手腳，以次貨充當正貨。

話時話，類似嘅劏客行為，相信香港人聽唔少，消委會亦都講過好多次。無良奸商最鍾意就係混淆視聽，雞乸咁大隻字寫住「二十元」，蚊鬚咁細粒字寫住「每両」，咁就呃到你四腳朝天，以為擺低二十蚊有一斤，其實盛惠三百二十呀老襯！至於變魔術掉包呢家嘢，買魚翅變翅骨已經算有良心o架喇，更加賤格嘅會魚翅變粉絲。

問題係，喂，呢個係美食嘉年華嚟o架，呢個係唔少消費者心目中會賣正牌正貨嘅展銷會嚟o架，好多內地同胞以及國際友人幫襯o架，點可以容許一粒老鼠屎搞臭一鑊粥？點可以忍受部分敗家仔佗衰成村人？主辦單位冇監管嘅咩？海關人員冇巡查嘅咩？

呢嗱嗱嗱，即係咁，你喺街邊檔幫襯無牌小販，買到劣質假貨都叫做心甘命抵啫，之但係你去到五星級酒店食鮑參翅肚喎，仲要係貴到飛起嗰隻，有乜可能會食到膠到無倫嘅塑膠玩具先？

唉，折墮咯，由於美食嘉年華嘅海味展銷區問題貨品愈揭愈有，好多顧客聲言對呢類展銷會失去信心，以後都唔會入場幫襯。

好心海關巡查唔好咁敷衍啦，執法唔好咁懶散啦。你話係咪死火吖，美食嘉年華變咗奸商群英會，呢頭劏客，嗰頭趕客，購物天堂呢個金漆招牌畀你搞到搖搖欲墜啦！