幾間大專院校發起嘅「大專饑饉24」尋日開幕，民政事務局局長曾德成以嘉賓身份，同現場百幾名大學生分享對饑饉嘅體驗，笑言佢試過餓到夢見雞尾包。佢講嘅時候輕描淡寫，間中現出一絲微笑，不過相信佢呢段經歷實情係一段艱苦歲月。
德成局長憶述，年少時代嘗到嘅飢餓，令佢知道番薯無飯咁襟飽，有飯食嘅時候，就算啲飯跌咗落地，佢都會不理衞生、不顧尊嚴執番嚟食，但最經典嘅莫過於佢曾經試過餓到發夢夢見雞尾包。
除咗飢餓，佢用成語野人獻曝作為引子，講述年少時被迫着住件短袖衫，喺十度低溫下度過咗超過一個月，突然有一日出太陽，佢形容當時嗰種溫暖係「一般人感受唔到」。
追問德成局長幾時有過呢啲體驗，佢就心照不宣，話大家應該知道o架啦！相信佢講嘅喺上世紀六七暴動期間，佢因為派發反殖民地嘅單張而鋃鐺入獄兩年時嘅往事。相信對德成局長嚟講，呢段往事並不如煙。