聖誕新年，立法會有假放，一眾議員官員都會趁機抖吓氣，去旅行嘅旅行，探親嘅探親，不過立法會議員李慧琼（Starry）就話佢無呢個福分，事關一放假佢就要做番好阿媽嘅角色，陪今年讀小二嘅囡囡溫書，邊度都無得去。
Starry話囡囡通常放完聖誕新年假就有中期考試，上年佢就帶咗囡囡去旅行，點知搞到個女成個心散晒，無辦法專心溫習，最後考試成績唔理想。有上年嘅慘痛經驗，Starry除咗為囡囡請補習老師，仲決定一放假就重拾媽媽嘅角色，望女成鳳，親自督促個女溫習，但就搞到自己同返工一樣咁忙，真係可憐天下父母心！
不過Starry話自己唔算係一個嚴格嘅媽媽，唔要求個女年年考第一，反而戥個女辛苦，因為依家嘅小學課程比起佢讀小學嗰陣難咗好多！咁唔知Starry有無試過畀個女嘅功課考起呢？