澳洲出名有樹熊，保安局副局長黎棟國屋企都有一隻樹熊，就係佢十八個月大嘅孫女。黎Sir嘅公子早年移居澳洲，早前添咗個千金，令黎家喜氣洋洋，黎Sir同太座唔單止喺早前放假期間「密密飛」，專程去澳洲探孫，仲用心良苦，喺電腦裝咗Skype，日日越洋同孫女玩。
唔知係唔係黎Sir上任保安局後工作忙咗，唔得閒喺網上見孫女，最近聖誕佢囝囝帶埋小Ｂ女返嚟，竟然對爺爺生疏咗，怕醜咗，見到陌生人唔瞅唔睬，仲要爹哋媽咪抱，好似樹熊咁，黎Sir話本來想帶埋小Ｂ女見吓老友，但怕佢唔睬人，都係無謂勉強。
黎Sir由於負責校園驗毒計劃，畀人改花名叫「毒王」都唔介意，佢話花名呢樣嘢，無所謂啦，不過似乎叫「禁毒王」意思啱啲。佢仲話政府嘅禁毒宣傳即將有新一輪攻勢，但具體情況就唔講得住，至於強制驗毒嘅諮詢工作，佢就話遲啲喇！