本文重點
唔少議員都會趁立法會聖誕新年放假去旅行鬆一鬆，但資訊科技界代表譚偉豪（IT豪）就旅行不忘工作，喺青島遊山玩水期間，見到人哋文化旅遊做得好出色，反觀香港就唔當文化旅遊係一回事，覺得非常激心，仲大鬧煲呔曾政府愚蠢，無政策保育文物，白白浪費咗本土文化。
遊青島大開眼界
IT豪前排同屋企人去青島玩咗四日三夜，參觀咗青島炮台遺址、康有為故居，同全國最大啤酒商青島啤酒嘅酒廠。點知IT豪無因為旅行而放鬆咗，反而為香港無適當嘅保育政策而心痛。IT豪話青島同香港其實有好多共通點，例如大家都係沿海城市，又畀外國管治過，佢唔明兩地既然有咁多共通點，點解青島可以喺現代化同保育之間做到平衡，但香港就唔得呢？
IT豪認為根本問題都係政府唔重視文化旅遊，又話其實政府咁諗係「蠢」，因為文化旅遊都係大趨勢，如果香港唔好好把握呢個機會，再遲啲就可能被比下去嘞！