查「甘威」「河蟹」有排搞

平時嘅內會都係有事准奏、無事退朝，快起上嚟半個鐘就收工。偏偏下周五嘅內會要推選議員加入調查委員會，調查民主黨議員甘乃威嘅「示愛事件」。我哋早前都講過，呢個規定有七名委員嘅調查委員會，喺泛民杯葛、建制派無人肯入嘅形勢下仍然湊唔夠腳，即使到時萬幸地湊夠數，反對調查嘅議員又會乘機再嘈一次。試問唔搞番一粒鐘，班議員又點會肯收口呢？

無獨有偶，民政事務局局長曾德成因為衰多口話大澳唔和諧，繼而演變出嚟嘅「河蟹事件」餘波未了。事緣泛民主派議員佔多嘅福利事務委員會，喺今年九月尾嘅特別會議上通過咗動議，要求立法會出動尚方寶劍《立法會（權力及特權）條例》調查「河蟹事件」，並要上內會尋求支持。輾轉成三個月，呢單嘢又係排咗期喺下周五嘅內會上討論，到時一輪口舌之爭勢必在所難免。

保守估計，單係上述兩單嘢已經要玩兩粒鐘，所以下午兩點半開波嘅內會，能夠喺四點半開完已經還得神落。就係咁，卿姐收到立法會秘書處嘅通知，財委會未必能夠準時喺三點開始。難為政府仲話三點鐘開始召開六個鐘嘅車輪會，須知道下周五嘅財會唔止高鐵項目有爭議，連撥款畀十八區區議會搞活動嘅項目一樣惹火，加埋涉及民生事務嘅北大嶼山醫院第一期、擴建文錦渡食物檢驗設施工程同埋屯門公路巴士轉乘站工程等，下周五嘅財委會，分分鐘變成史上最長命嘅一次！