本文重點
知名政治評論家、香港台灣工商協會會長江素惠（Susie），出席公開活動時經常令人眼前一亮，佢不嬲鍾情於旗袍，就算唔着旗袍都鍾意着鮮紅色嘅衫。卓妮早前喺個酒會度見到佢，當日佢索性着咗件鮮紅色旗袍，一次過集齊晒佢嘅最愛。
幫襯名師蔡孟夏
Susie嗰日嘅行頭係購自連卡佛嘅，紅色貼身旗袍連埋紅色皮草披肩，襯到佢喜氣洋洋。Susie承認佢好鍾意鮮紅色，因為可以令人明亮啲、開心啲，最緊要係令到佢顯得明艷照人！
講起着旗袍，Susie話佢都係喺官場學番嚟嘅，國民黨仲未喺二○○○年失去政權之前，啲官夫人個個都係咁着，Susie嗰陣時係台灣駐港機構光華新聞文化中心主任，經常要出席正式場合，所以佢經常幫襯台灣知名設計師蔡孟夏，一返去台北就訂做幾套，每套要八、九千元港幣㗎！
講起蔡孟夏，好多明星名流都對佢耳熟能詳，好似台灣第一名模林志玲、新加坡藝人孫燕姿等，都係佢嘅客仔，香港中藝都有得賣，要萬幾元一件。