如果大家經常喺港島區出入，相信會聽過灣仔軒尼詩道老字號生記海鮮飯店，招牌菜係鹽焗雞同泥鯭粥，但身為馬會大董嘅前律師會會長周永健反而極力推介生記嘅涼瓜或火腩炆斑翅，佢大讚生記嘅斑翅炆得香又好食，斑翅肉質夠晒嫩滑，所以成為佢每次去食飯嘅必點菜式。
生記嘅炆斑翅係選用海麻斑、海油斑或青斑，涼瓜就選用新界最靚嘅「雷公鑿」，出名甘而不苦，食落香脆，但較一般涼瓜貴一半價錢。涼瓜炆斑翅煮法會加上豉汁、蒜頭及香葱一齊炆，色香味俱全。至於火腩炆斑翅就會用火腩、枝竹、豆卜及蘿蔔配以柱候醬一齊炆，食落特別惹味。
由於一條斑只得兩塊翅，如果多人食就要幾條斑嘅翅先至夠，好似周永健咁去親都十幾廿人，就要預早一至兩日致電生記預留斑翅嘞！