Wilfred尋日一行五人去咗ifc嘅Ermenegildo Zegna，佢哋五個大男人喺門口個呔櫃前面有傾有講，最後每人揀咗一條。揀完呔，Wilfred等其他朋友去揀心水貨品，自己就一個人去咗袖口鈕櫃，烏低身欣賞入面啲貝母袖口鈕，大概十分鐘之後，大家攞住戰利品出嚟，一人一袋，男士買嘢果然速戰速決。

Ermenegildo Zegna領呔質料細緻，最貴嘅千八蚊一條都有。

一班男士挑選領呔，都有商有量。

依家身兼新昌營造集團同駿豪集團副主席嘅Wilfred，仲係地產基金Pacific Star大中華區嘅負責人，今次佢就係同Pacific Star喺新加坡嚟嘅同事一齊行街，Wilfred話大家食完飯行吓街，Pacific Star嘅主席提議大家過新年戴新呔，最後好闊佬咁向每位同事送咗條靚呔，任佢哋自己揀。

陪囝囝攞樂壇成績表

講開過新年，啱啱同太太喺南極叉完電返嚟嘅Wilfred，依家有無限能量搏殺，所以新年唔再出埠，留喺香港同埋囝囝王梓軒一齊倒數，梓軒係今年樂壇新人，Boxing day嗰晚Wilfred都有去睇囝囝收樂壇第一張成績表，喺新城電台攞咗個勁爆新人王嘅創作歌手獎。

除夕夜梓軒要做完倒數騷先可以過嚟陪爸爸倒數，不過Wilfred好體諒，仲鼓勵梓軒難得搵到一份自己有興趣嘅工作，佢仲透露梓軒依家籌備緊第二張大碟，估唔到工作忙到暈嘅Wilfred對囝囝嘅事咁瞭如指掌，果然係廿四孝爸爸。

成立於一九一○年嘅意大利品牌Ermenegildo Zegna，以製造高品質面料起家，專營奢侈男裝，本港好多高官名人都幫襯佢，○八年全球營業額達逾八億歐元，今次Wilfred就揀咗價值千四蚊嘅絲質領呔。

卓妮