陪試鞋睇飾物

卓妮見Lois試咗陣鞋，發覺唔係好啱，就同爸爸轉去睇飾物。攞住杯咖啡喺度歎嘅二少，睇咗一陣後索性攞支筆出嚟，一邊睇，一邊喺玻璃飾櫃上畫吓畫吓，唔知係咪做開時裝嘅二少，喺度偷師攞靈感呢？不過兩父女最後都係無斬獲，莫非二少見到卓妮怕醜唔買、抄低飾物嘅型號？

其實二少一家人感情好好，佢同卓妮講，前晚平安夜，一家人就留喺屋企食飯，過咗個不折不扣嘅Silent night。講到聖誕節送咩禮物畀太太同囡囡，二少話自己忙到無時間預備禮物，難得家人好明白，唔怪佢之餘仲掉番轉頭送畀佢，聽落都幾窩心喎！

田二少絕對係廿四孝爸爸，幾年前歌手陳冠希（Edison）開慈善簽唱會，當時仲係九鐵主席嘅二少百忙中抽空陪囡囡去捧場，仲捐咗一萬蚊畀慈善機構，等囡囡攞埋簽名影埋相。今年九月二少同一班大學生分享成功之道，講到細女畢業遇正金融海嘯搵唔到工，最後搵咗兩份無薪酬嘅設計工作，二少隔空鼓勵囡囡，話只要搵到有興趣嘅工種，就可以識到行內人，自然可以一步步建立自己嘅事業，果然係個好爸爸！

卓妮