本文重點
已故華懋集團主席龔如心千億爭產案裁決在即，華懋掌舵人龔仁心對官司充滿信心，唔單只將華懋集團總部搬回荃灣如心廣場，並結束行醫生涯重返華懋做掌舵人，前晚平安夜又與太太劉元春同妹妹龔因心，一齊出席喺如心廣場露天廣場舉行嘅「舞動荃城迎聖誕」活動，更上台與荃灣區議會主席周厚澄等嘉賓來個大合照，以主人家身份擺出勝利姿態！
兩兄妹着紅衫應節
卓妮前晚見龔仁心和龔因心不約而同穿着紅色衫出席迎聖誕活動，除咗應節之外，仲好好意頭，難怪龔仁心心情勁靚，喺台下仲同太太有講有笑添。
當晚大會安排咗精彩又緊湊嘅舞蹈表演，包括西班牙舞、巴西舞、俄羅斯舞等，又有多位歌星獻唱，連串勁歌熱舞及緊張嘅倒數環節，台下嘅龔仁心夫婦、龔因心及華懋集團老臣子吳崇武，都興奮得揮動及敲打吹氣棒熱鬧一番！
如心廣場現時稱得上係荃灣地標，每逢大節日都會送上大型慶祝活動，由於位置近港鐵荃灣西站，而且地方夠晒大，連新界鄉議局近年都將新春團拜酒會移師到呢度，最近龔仁心更加喺如心海景酒店大排筵席娶新抱，在家姐龔如心命名嘅地方搞婚宴，別具意義。
卓妮