民政事務總署尋日無喇喇發咗份新聞稿，告知傳媒工展會設立一個專區推廣社企產品及服務，有十六間由署方「伙伴倡自強」計劃資助成立嘅社企參展，當中包括出晒名嘅「東華三院大角咀麥太」甜品屋，呼籲市民多多支持。新聞稿原意係好嘅，可惜遲咗十二日發出，事關工展會於本月十二日已經喺維園揭幕，至今已經係第十四日展出。

署方仲自我踢爆，話呢十六間社企係分三個階段展出，各為期六至八天，換句話首兩批社企未能受惠於新聞稿嘅宣傳，即使生意唔好都要焗住交場畀下一批社企參展。陳甘美華之所以被冠名「騰雞美華」，皆因佢騰雞又怕事，但今次新聞稿事件，就發現佢仲鍾意發夢，莫非尋日睇到本報報道東華三院旗下社企推銷聖誕曲奇後，忽然如夢初醒？

煲呔曾使得少 嚇退下屬

騰雞美華發新聞稿嘅用意何在暫且不談，但如果大家有留意新聞嘅話，當日主持開幕嘅煲呔曾懶威風帶頭去消費，點知雷聲大雨點小，兜咗幾個圈，都只係使咗一千八百幾元，比去年使咗超過一萬元簡直大縮皮，理由係唔使再刺激經濟喎！唔知係咪呢個慳住荷包嘅後遺症，好多司局級官員都唔敢去工展會打氣，擔心使錢多過煲呔曾就會風頭蓋主，使得少又被人鬧孤寒，所以不去也罷。

記得去年初擴大問責制推出時，好幾位副局長及政治助理都有到工展會消費，為工展會打氣，包括未升任特首辦主任嘅政制及內地事務局副局長譚志源、商務及經濟發展局副局長蘇錦樑（Greg）、勞工及福利局政治助理莫宜端等，各人定下一千元消費目標，阿Greg買咗十個慳電膽，仲使幾百元請大家食南非鮑魚添。可能今年少咗名人高官宣傳，入場人次似乎較為遜色，真係多得煲呔曾唔少！